IcelandFurs

Saga Hópsins

Það er hægt að rekja sögu IcelandFurs (sem kallast einnig IceFurs og Icelandic Furries) alla leið til 2006. Það var ekki fyrr en árið 2009 sem hópurinn myndaðist formlega og tók up nafnið IcelandFurs.

Sá sem átti heiðurinn á að smala saman upphaflegum meðlimum hópsins árið 2006 kallast Redward. Þetta byrjaði smátt, hittingar í Kringlunni eða álíka stöðum, flestir með skissubækur og penna til þess að hanga saman meðan fólk teiknaði. Stundum voru þessir hittingar haldnir í kringum heimsóknir erlendra loðbolta, til að skemmta þeim.

Gaman er að nefna að hann Kjartan Arnórsson (einnig þekktur sem Karnó) mætti á einn fyrsta hittinginn, sem er þekktur íslenskur myndasöguhöfundur sem flutti til Bandaríkjana sem hefur örugglega verið lengst allra Íslendinga í furry samfélaginu svo við vitum.

Meðlimir hópsins koma saman til þess að skipuleggja hittinga eða fara saman á skemmtilegar samkomur og viðburði bæði innanlands og erlendis, þar sem hópurinn sjálfur skapar umhverfi sem leyfir fólki að skemmta sér saman.

Meðlimir hópsins skipulögðu saman fyrstu sumarbústaðarferðina árið 2013 og hefur það orðið að árlegri hefð síðan þá. Ekki löngu eftir það var IcelandFurs komið á Telegram, sem tók alveg yfir sem helsti samfélagsmiðill hópsins. Hópurinn var farinn að vaxa ört upp úr þessu.

Árið 2019 var byrjað að skipuleggja sameiningu hópsins við annan hóp af íslenskum loðboltum, sem kallaðist IceFurs, en það gerðist ekki formlega fyrr en 2023. Discord spjall var stofnað fyrir hópinn á þessum tímamótum sem hefur vaxið ört og hefur nú um 260 skráða meðlimi í lok árs 2025.

Hópnum er stýrt af smáum hópi sjálfboðaliða sem vinna saman með það markmið að skapa gott umhverfi fyrir meðlimi hópsins.

Árið 2013 tók Abby Fennec yfir sem leiðtogi hópsins og var mjög iðinn við að auglýsa hópinn með límmiðum. Abby hefur alltaf haft brennandi áhuga fyrir öllu því sem telst til furry og var mjög virkur síðan hann kom í hópinn 2012. Það er hægt að segja að honum tókst að verða að lukkudýri hópsins um stund, þar sem hann átti fullan búning af persónunni sinni og dreifði límmiðum með mynd af sjálfum sér um allan bæ sem vísaði í IcelandFurs vefsíðuna, hann kom jafnvel fram í nokkrum viðtölum og sjónvarpsefni um áhugamálið í gegnum árin. Abby hætti sem leiðtogi hópsins sumarið 2019 af persónulegum ástæðum og sagði sig svo loks formlega úr stjórn hópsins snemma árið 2023. Hann ákvað að fara sína eigin leið og stofna aðskilinn hóp árið 2025 í kringum vinsæla viðburðinn IceFurCabin en hann hefur verið að endurnýta flesta félagsmiðla IcelandFurs sem hann hafði stjórn á þegar hann varð viðskila við hópinn í stað þess að láta þá af hendi þegar hann steig úr stjórn.

Fjölmiðlar

Í gegnum árin hafa loðboltarnir sprottið upp í fjölmiðlum og sjónvarpsefni.